ثلاث اسـنين

من طرف ماريا الأحد يونيو 22, 2008 2:03 pm

ثلاث اسنين أنا أخطط لهذا اليوم يابوسعود...... تيسر حالي وجاهز أوفي وعدي بوقته
وفجأه جاتني تتعذر تقول تأخرت الوعود......وأنا مستغرب وأسمع كأني وعدها خنته
حسبت إنها تمازحني وتتصنع جفه وصدود......ضحكت بوجهه من قلب مع إنها بايخه النكته
وقالت ارضى بالواقع قلبي ما هو المعهود......تغير كل شي صوبك نصيبي ما أظن إنته
كنت في يوم محبوبي ولكن ما أظن نعود......وصل من قبل ماتوصل وأنا ذاك الصبر عفته
ولكن تكفى صدقني ويشهد ربي المعبود......ترى ما خنتك بغفله ولا كلمته وشفته
صراحه أهلي قالوا لي بأنه ولد أصل وجود......وجتني أمه با الصوره وبكلمات المدح أخته
سكت وقلت هي فرصه مادام الجود في الموجود......وقالوا كل من حولي علامات الرضى سكته
وانا فكرت دام أمه وأخته ماعليهم زود......أكيد إني براضيهم إذا وافقت واخترته
وأراضي أهلي واخواني مدام ان الفرح مقصود......عطيت الناس انا كلمه ومعاهم وقتي حددته
ولا اقدر اغيرها ترى عند العرب منقود ...... اوافق واعتذر باكر واقول الراي غيرته
تبي تشرح لي المنقود تصدق عاد يابوسعود......تبيني أقتنع وأرضى بحلًا عمري ما عشته
أنا ماني بقايلها عسى يفرش ثراها ورود......بعد ما حطمت قلبي وطعم الموت جربته
عسى بفستانها أشواك وفي ثوبه عقارب سود......وناراً تحرق الكوشه وتحرق بيتهم حته
وموت بالليلة الدخله يبرد حرتي يا كود......ولا أحس إن بحضنه يلامس خد لامسته
علي اهون اذا ماتوا ولا بنفس السرير رقود......ترى صعباً علي اتخيل ما تخيلته
عسى قاع الثرى يقسى ويتحول صخر جلمود......وحفار القبر يرفض يسوي فوق مقدرته
ترى دفنة عديم الذات تلوع شبد حتى الدود...... ومن حان العهود ومات تعافه حتى مقبرته
عسى ربي يجازيهم بحبلاً من مسد مدود......يعلقهم من اطرافه وفوقه ناراً وتحته
أنا ماني حقود وشين ولاني من نسل نمرود......ومن حط نفسه بوضعي بيقول إلي انا قلته
مادام الفعل له ردت فعل والله ابشري بردود......بدعي دامً إني حيً وبغرس با الدعا نبته
وبسقيها نزيف القلب ودمع ما رحم الخدود......وتكبر والثمر ثاري من الي خانني وصنته
انا نذرً علي اكتب وافجر ها القصيد ارعود......واسمع كل البشر صوتي عجبته ولا زعلته
وأردد للي سمعني اذا حبيت حط احدود......انا حبيت دون حدود وشوف الي تكبدته
ثلاث اسنين أنا أبني وجات صورة بكل برود......خذت شقى عمري وحلما قلت حققته
ثلاث اسنين انا اخطط لهذا اليوم يابوسعود...... وتوافق من كلام اخته وصوره اربع في سته